Hyä yritys, muttei aivan turhanpäivänen!
No niin, kesäkokkous on pietty 29.7. ja sen jälkheen 5.8. yritethiin pittää riistakolmiolaskenta, jonka yhteyvessä aatelthiin panna kans polttopuut sisäle liiterhiin. No net klapit saathiin liiterhiin, mutta kylläse kolmio jäi laskematta väen vähhyyen takia.
Kesäkokkouksessa oli kans vain kouralinen porukkaa, mutta hyviä päätöksiä saathiin kuiteski aikhaan. Rauhotukset käsitelthiin, otethiin muutama uus jäsen mietithiin kauhriin ja hirven mettästystä tulevana syksynä, päätethiin vieraskorttien myynistä ja siinä net tärkeimät sitte oliki. Parasta näissä kokkouksissa on kuiteski se jälkikokkous, jossa kaikki parhaat juorut käyhän läpi ja sielä niitä tullee kauheasti hyviä iteoita, net vain pitäs saaha paremphaan muistiin ko pää, ko ei niitä kukhaan jälkheen ole kuitenkhaan totteuttamassa ko net jäävä ylheensä vain puhheeksi. No se siittä kokkouksesta.
No se kolmiolasku jäi sitte tekemättä niinkö ennemmin jo totesin, mutta kyllä net klapit sinne sisäle saathiin. Kolmiolaskua päätethiin yrittää uuestaan torstaina 11.8. klo 18.
Majala oli tuon koulunumeron verran väkeä eli tasan kymmenen. Oli Ahon Kimmo, Eskon Risto, Pelttarin Tuomas, Alakokkahreen Vesa, Fräkin Raimo, Rautopuron Kauko ja Tauno, Bomströmmin Aatos, Rantajärven Ville ja Pelimannin Matti. Ei sen puohleen, etteikö met olis tuota räkninkiä osattu tehä, mutta ko meistä kaikista ei ollu kuiteskaan kävehleen tuota reittiä ja ko sinne tarvithiin vähhinthään yheksän jalkavaa ja meitä oli kuiteski vain 5, niin homma päätethiin siirtää ens torstaiksi (11.8). Toivon mukhaan sinne tullee silloin paljon väkeä. Raimo meinas että puolitoista tiimaa siinä menne, että se niin kova homma kuiteskaan ole. Solis hyä jos saatas laskettua, ko Vojakkalan Errää on kehuttu, että on ollu melkeimpä ainoa toimiva kolmio koko Torniossa ja laskettu usseimmiten koko läänissäki. Mie olen kans kävely kolmion yhen sivun ainaski kuus kertaa. Olis kyllä hyä, jos välilä kävis vähän erikki ihmiset vaeltamassa.
No se tuosta tällä kertaa. Ei met sielä majala vain klapia paiskottu. Paistethiin met laavula makkaraa ja täytyy sanoa, että oli hyviä juttuja joile sai nauraa kovastikki.
Net kaikki klapit ei mahtuhnee sisäle, mutta pinothiin järjestykseen ulos. Ampiaiset olit omihnee liiterin ittele, mutta met päätimä kuiteski, ko ryökäleet menit pistähmään Veskua kahesti, laittaa net muuttopuuhhiin.
Alla pari kuvatokumenttia tapahtumasta.
Kuva 1. Klapit sisälä ja pinossa
Kuva 2. Juttu lentää ja makkara paistuu
-nokipannu-
Takasin kahvile!